విశ్వరూపసందర్శనయోగః 4 (అథ ఏకాదశోధ్యాయః, భగవద్గీత)
యథా నదీనాం బహవోంబువేగా
స్సముద్ర మేవాభిముఖా ద్రవంతి
తథా తవామీ నరలోకవీరా
విశంతివక్త్రాణ్యభివిజ్వలంతి.
ఏ ప్రకారము అనేక నదీప్రవాహములు సముద్రాభిముఖములై ప్రవహించుచు అందు ప్రవేశించుచున్నవో, ఆ ప్రకారమే ఈ మనుష్యలోకమందలి వీరులు (రాజులు) లెస్సగ జ్వలించుచున్న మీ నోళ్ళయందు ప్రవేశించుచున్నారు.
యథా ప్రదీప్తం జ్వలనం పతజ్గా
విశంతి నాశాయ సమృద్ధవేగాః,
తథైవ నాశాయ విశంతిలోకా
స్తవాపి వక్త్రాణి సమృద్ధవేగాః.
ఏ ప్రకారముగ మిడతలు వినాశము కొరకు మిక్కిలి వేగముతో గూడినవై బాగుగ మండుచున్న అగ్నియందు ప్రవేశించుచున్నవో, ఆ ప్రకారమే జనులున్ను మిగుల వేగముతో గూడినవారై నాశము కొరకు మీ నోళ్ళయందు ప్రవేశించుచున్నారు.
లేలిహ్యసే గ్రసమాన స్సమంతా
ల్లోకాన్‌ సమగ్రాన్‌ వదనైర్జ్వలబ్ధిః
తేజోభిరాపూర్య జగత్సమగ్రం
భాసస్తవోగ్రాః ప్రతపంతివిష్ణో.
ఓ కృష్ణమూర్తీ! మండుచున్న మీయొక్క నోళ్ళచే జనులందరిని అంతటను మ్రింగుచున్నవారై ఆస్వాదించుచున్నారు. మీయొక్క భయంకరములైన కాంతులు తమ తేజస్సులచేత జగత్తునంతను వ్యాపించి మిగుల తపింపజేయుచున్నవి.
ఆఖ్యాహి మే కో భవానుగ్రరూపో
నమోస్తు తే దేవవర ప్రసీద,
విజ్ఞాతుమిచ్ఛామి భవంతమాద్యం
న హి ప్రజానామి తవ ప్రవృత్తిమ్‌.
దేవోత్తమా! భయంకరాకారముగల మీరెవరో నాకు చెప్పుడు. ఏలయనగా మీ ప్రవృత్తిని ఎరుంగకున్నాను. కనుక ఆదిపురుషులగు మిమ్ముగూర్చి తెలిసికొనగోరుచున్నాను. మీకు నమస్కారము నన్ననుగ్రహింపుడు.
శ్రీ భగవానువాచ:-
కాలోస్మిలోకక్షయ కృత్ప్రవృద్ధో
లోకాన్‌ సమాహర్తుమిహ ప్రవృత్తః,
ఋతేపి త్వా న భవిష్యంతి సర్వే
యే వస్థితాః ప్రత్యనీకేషుయోధాః.
శ్రీ భగవంతుడు చెప్పెను - (ఓ అర్జునా) (నేను) లోకసంహారకుడనై విజృంభించినకాలుడను అయియున్నాను. ప్రాణులను సంహరించు నిమిత్త మీ ప్రపంచమున ప్రవర్తించుచున్నాను. ప్రతిపక్ష సైన్యములందు గల వీరులు నీవు లేకపోయినను, యుద్ధము చేయకున్నను జీవించియుండరు (మృతినొందక తప్పరు).
తస్మాత్త్వముత్తిష్ఠ యశో లభస్వ
జిత్వా శత్రూన్‌ భుజ్క్ష్వ రాజ్యం సమృద్ధమ్‌,
మయైవైతే నిహతాః పూర్వమేవ
నిమిత్తమాత్రం భవ సవ్యసాచిన్‌.
కాబట్టి నీవు లెమ్ము. శత్రువులను జయించి కీర్తిని బడయుము. పరిపూర్ణమగు (నిష్కంటకమైన) రాజ్యమును అనుభవింపుము. వీరందరును ఇదివరకే నాచేతనే చంపబడిరి. కావున ఓ అర్జునా! నీవు నిమిత్త మాత్రముగ నుండుము.
ద్రోణం చ భీష్మం చ జయద్రథం చ
కర్ణం తథాన్యానపి యోధవీరాన్‌
మయా హతాంస్త్వం జహి మా వ్యధిష్ఠా
యుధ్యస్వ జేతాసి రణే సపత్నాన్‌.
నాచేత (ఇదివరకే చంపబడిన ద్రోణాచార్యుని, భీష్మాచార్యుని, జయద్రథుని, కర్ణుని అట్లే ఇతర యుద్ధవీరులను గూడ నీవు చంపుము. భయపడకుము. యుద్ధము చేయుము. శత్రువులను గెలువగలవు.
సంజయ ఉవాచ:-
ఏతచ్ఛ్రుత్వా వచనం కేశవస్య
కృతాఞ్జలిర్వేపమానః కిరీటీ,
నమస్కృత్వా భూయ ఏవాహకృష్ణం
సగద్గదం భీతభీతః ప్రణమ్య.
సంజయుడు చెప్పెను - అర్జునుడు శ్రీకృష్ణ మూర్తి యొక్క ఈ వాక్యములను విని వణకుచున్నవాడై చేతులు జోడించుకొని శ్రీకృష్ణునకు నమస్కరించి మిగుల భయపడినవాడగుచు వినమ్రుడై గద్గదస్వరముతో నిట్లు పలికెను.
అర్జున ఉవాచ :-
స్థానే హృషీకేశ తవ ప్రకీర్త్యా
జగత్ప్రహృష్యత్యనురజ్యతే చ,
రక్షాంసి భీతాని దిశో ద్రవంతి
సర్వే నమస్యంతి చ సిద్ధసజ్ఘాః
అర్జునుడు చెప్పెను - ఓ కృష్ణా! మీయొక్క నామము నుచ్చరించుటచేతను, మాహాత్మ్యమును లెస్సగా కొనియాడుటచేతను లోకము మిగుల సంతోషించుచున్నది. మిక్కిలి ప్రీతిబొందుచున్నది. (నిన్ను జూచి) రాక్షసులు భయపడినవారై దిగంతములకు పరుగిడుచున్నారు. సిద్ధుల సమూహములన్నియు మీకు నమస్కరించుచున్నవి. ఇవియన్నియు మీ మహిమకు తగియేయున్నవి.
No comments:
Post a Comment